„Mir musse Positioun huelen, mir däerfen nimools vergiessen, mir däerfen nimools ophalen d’Wourëcht ze soen.“ Dëst Zitat vum Simon Wiesenthal ënnersträicht d’Wichtegkeet vun der Mémoiresarbëscht. De Lycée du Nord ass der Meenung, dass ee Geschicht net nëmmen am Klassesall soll vermëttelen, mee dass ee Geschicht soll erliewen. An deem Sënn huele mir eis Aufgab als Passeurs de mémoire ganz eescht.
Vum 26. bis den 31. Oktober huet den LN dofir un engem Voyage scolaire pédagogique op Auschwitz, organiséiert vun den Témoins de la 2ième génération, Deel geholl. Enger Rei Schüler, zesumme mat hiren Accompagnateuren, ass erméiglecht ginn un dëser emotionaler an onvergiesslecher Rees deelzehuelen.
Wärend dräi Deeg haten d’Schüler d’Méiglechkeet Auschwitz I an Auschwitz Birkenau a Form vu Visites guidées op eng perséinlech Aart a Weis ze erliewen. Well esou eng Rees keen onberéiert léisst, haten d’Schüler d’Méiglechkeet sech a verschidde Workshops auszetauschen.
D’Rees gouf mat enger flotter Visite vun der polnescher Staadt Krakau ofgeronnt, wou de Schüler och den Alldag vun der jüdischer Bevölkerung während dem 2. Weltkrich méi no bruëcht ginn ass
Auschwitz huet eis gewisen, dass een och no méi wéi 80 Joër d’Pflicht huet sech géint d’Vergiessen ze wieren. Eng Rei Andréck wäerten och mir sou séier net vergiessen…
